حركة شباب لبنان تكرم المحامي الدكتور زياد بيطار

أقامت حركة شباب لبنان إحتفالها التكريمي المركزي الثاني في ٣۰ كانون الثاني ٢۰١٥ كرمت خلاله ٩ شخصيات لبنانية تميزت في مجالها و مسيرتها و كانت البداية مع سفير الأمم المتحدة للشؤون القانونية في الشرق الأوسط المحامي الدكتور زياد بيطار الذي سلمه الدرع التقديري كل من النائب الأستاذ شانت جنجنيان و نقيب المحامين الأستاذ جورج جريج و ممثل نقيب المحررين الأستاذ الياس عون الأستاذ ابراهيم الخوري لكونه رجل العام القانوني و عن مجمل مسيرته و لنيله دكتوراه في القانون الدولي .

 كلمة التعريف بسعادة السفير المحامي الدكتور زياد بيطار
ألقاها سعادة النائب شانت جنجنيان

هو الحقوقي من رحم الإنسانية
هو الإنسان المتعطش إلى العلم
هو المثقف الآتي على حصان النجاح و التميز
هو من أبرز مَن سخر القانون في خدمة حرية الإنسان
هو الخارج من دار جلالة الحقوق و القانون الدولي دكتورا
“هو المحلق في سماء الإنسان و حقوقه سفيرا”
انه سعادة السفير المحامي الدكتور زياد سعود بيطار

كلمة سعادة السفير المحامي الدكتور زياد بيطار في حفل تكريمه

معاً و بإيد وحدي بدنا نناضل كرمال هلوطن يللي ما بيموت،
يلّي نورو بيبقا مضوي شاء الغير أو أبى،
يلّي أرضو ارتوت بدم الشهدا، يلّي مهما دنّس ترابو الطغاة و الظالمين و الإرهابيين، بيرجع بينهض بعد كل نكسة،
و بترجع روحو بتنبعث بإرادة شعبو؛
يلي بيحمل بدمّو ثورة الكرامة و العنفوان، ثورة الحرية و الديمقراطية، وثورة الفكر و الحضارة .
لبنان الموجود من آلاف السنين،
بلد العباقرة و الحرف و الأرز
بلد الأديان المقدّسة و الآيات المنزلة
هيدا لبنان يلي بفتخر قول أنو وطني، و بفتخر أقسملو بالله العظيم
و بتعهدلو، بمساعدة كل واحد منكن، أنو يرجع مش بس أمّ الشرائع، كمان أمّ المبادئ؛
بدنا نخلّص لبنان من النفق المظلم يلي دخلو، بإنتخاب رئيس للجمهورية،
و ما بيجوز التغاضي عن هيدا الإستحقاق تحت أيّا ظرف .
فالرئيس بيعطي الأمان و الإستقرار، ومن دونو بيتعرض لبنان لمختلف الهبّات الخارجية يلي بتتقازفا الدول تبعاً لمصالحا الشخصية؛ نحنا بدنا رئيس وفقاً لمعاييرنا وإرادتنا الداخلية؛ كفانا تزلم  واستسلام .
وين مبدأ تداول السلطة يلّي بيعكس الوجه الديمقراطي للبنان بقانون انتخاب عادل وفقاً للدستور!؟ قانون بيضمن الخروج من توارث السلطة، و إعطاء الفرص لأصحاب الكفاءة للوصول لسدة الحكم.
وين صار تطبيق الطائف؟ مش هو دستور لبنان!
وين تطبيق اللامركزية الإدارية لتسهيل خدمة المواطنين وتلبية حاجاتهم؟
وين المحافظة على حقوق المرأة  يلّي لازم تكون مصانة؛ و ليش ما منشوفا بمنصب رئيس الجمهورية، أو رئيس مجلس النواب أو رئيس مجلس الوزراء .
منطالب بدولة القانون و العدالة الإجتماعية، وبالمشاركة بين الطوائف والحضارات مش بين السياسات، تا نبني لبنان الديمقراطي و نطور لبنان الحضاري .
– نحنا الشعب، ما بقا بدنا نسأل الحق ع مين، بدنا نسأل شو عملنا و وين غلطنا تا وصلنا لوطن في حكّام بلا شعب حرّ، و شو عملنا بوطن كان بيتغنّى بالديمقراطية، تا صار وطن بتسودو الديكتاتورية، فتاريخ الشعب اللبناني بيحكي عن مقاومتو للظلم  و نضالو ضدّ القتل و العذاب والخراب، و بيرفض الإنكسار و دايماً عالي الراس، و دايماً كان صوتو أعلى من هدير المدافع .
فهو بيرفض يتخلّى عن شبر من أرضو، و مستعد عا طول يضحّي  ويقاتل باسم الحرية و حقوقو المأخوده، و لقمة عيشو المغمسّي بالدم،
– و كرمال هيك بجرأة الحق بتوجه للحكام و بقلّن:
ما تخلو لبنان عقدة سياسية ناطرة تتحلا الإيام، ما تكونوا أسرى محاور اقليمية أو داخلية، كونوا أسرى مطالب الناس.
المجلس النيابي مش ملك خاص، و الحكومة مش ملك اقطاعات و حصص، هنّي ملك الشعب اللبناني.
كونوا حدّ الشعب تا يكون الشعب حدكن،
عيشوا مع الشعب مش بقصوركن العالية، شاركوا عذابو،
عطوا كهربا مش اشتراك كهربا،
عطوا ماي مش صهاريج ماي،
عطوا أمان مش جثث و خراب،
عطوا علم و طبابة و سقف فوق راسو، مش بيوت مهجورة و مهدومة،
عطوا نضافة و بيئة صحيّة مش جبل نفايات و أكل ملوّث،
عطوا وظايف مش سبب للهجرة عبلاد الإغتراب
عطوا دعم وإهتمام بالشباب و الرياضة لمصلحة وطنية مش لمصلحة شخصية
خلي يكون لبنانن هوي لبنانكم، لبنان السلام والإزدهار والديمقراطية، لبنان جوهرة الشرق.
بس حذاري إذا ثار الشعب يوماً
حذاري إذا قرر يصرخ بوج الطغيان و الكبت والتبعية
ساعتا، بتشوفو عاصفة الثورة الحقيقية .
ثورة الأحياء و الشهدا
ثورة الأقلام و المعاول
ثورة الإيمان يلي بتغلب عاصفة الخراب و القتل والظلم والدمار
ثورة الشعب اللبناني الحر و المناضل
كما بدعي الحكام لتوجيه أنظارن للعسكريين الصامدين بظل أقسى وأصعب الظروف ، تا يحاربوا الإرهاب، و بسألن وين صار السلاح يلي نوعد في جيشنا للدفاع عن الوطن!؟
مسيرة المواجهة لإسترداد الحقوق المغتصبة بلشت بإدعائي أمام مجلس الشورى لإبطال مرسوم دعوة الهيئات الناخبة للإنتخابات و كملّت بتقدمي ببلاغ أمام مفوضية الأمم المتحدة السامية لإنتهاك الديمقراطية ومبدأ تداول السلطة حفاظاً على حقوقنا كلنا .
على هيدا الأساس بدعي الجمعيات المدنية للتضامن معاً تا نوقف الظلم و الذل و إغتصاب حقوق الإنسان بلبنان، من خلال عقد مؤتمر للخروج بمقررات وطنية تصون الحريات و حقوق الناس .
هالمؤتمر رح يتم الإعلان عن تاريخو من خلال الإعلام وموقعنا على التواصل الإجتماعي بالقريب العاجل انشا الله.
شكراً
عشتم و عاش لبنان